1 Timothy 2 WYC
Summary: Paul urges that prayers, intercessions, and thanksgivings be made for all people, including kings and those in authority, so that believers may live peaceful and godly lives, since God desires all people to be saved and to come to knowledge of the truth. He affirms one mediator between God and humanity, Christ Jesus, who gave himself as a ransom for all. He instructs that men pray without anger or quarreling, and that women adorn themselves with modesty and good works rather than elaborate dress, addressing instruction and authority in the worship setting and referencing the order of Adam and Eve's creation and fall.
1Therfor Y biseche first of alle thingis, that bisechingis, preieris, axyngis, doyngis of thankyngis, ben maad for alle men,
2for kingis and alle that ben set in hiynesse, that we leden a quyet and a pesible lijf, in al pite and chastite.
3For this thing is good and acceptid bifor God,
4oure sauyour, that wole that alle men ben maad saaf, and that thei come to the knowyng of treuthe.
5For o God and a mediatour is of God and of men, a man Crist Jhesus,
6that yaf him silf redempcioun for alle men. Whos witnessing is confermyd in his tymes;
7in which Y am set a prechour and an apostle. For Y seye treuthe, and Y lie not, that am a techere of hethene men in feith and in treuthe.
8Therfor Y wole, that men preye in al place, liftinge vp clene hondis with outen wraththe and strijf.
9Also wymmen in couenable abite, with schamefastnesse and sobrenesse araiynge hem silf, not in writhun heeris, ethir in gold, ethir peerlis, ethir preciouse cloth; but that that bicometh wymmen,
10biheetinge pite bi good werkis.
11A womman lerne in silence, with al subieccioun.
12But Y suffre not a womman to teche, nether to haue lordschip on the hosebonde, but to be in silence.
13For Adam was first formed, aftirward Eue;
14and Adam was not disseyued, but the womman was disseyued, in breking of the lawe.
15But sche schal be sauyd bi generacioun of children, if sche dwellith perfitli in feith, and loue, and hoolynesse, with sobrenesse.
Also read this chapter in: KJV, WEB, ASV, GNV, WBT, DBY, YLT