Ecclesiastes 6 WYC
Summary: The Preacher names a particular evil: a man to whom God gives riches, wealth, and honor so that he lacks nothing, yet God does not give him power to enjoy them, and a stranger enjoys them instead — this he calls vanity and a sore affliction. He argues that even a man who fathers a hundred children and lives many years is worse off than a stillborn child if his soul is not satisfied with good things and he receives no proper burial. All man's toil is for his mouth, yet appetite is never filled, and the wise fare no better than the fool; the chapter ends asking who can know what is good for a person during the few, fleeting days of a vain life.
1Also another yuel is, which Y siy vndur the sunne; and certis it is oft vsid anentis men.
2A man is, to whom God yaf richessis, and catel, and onour; and no thing failith to his soule of alle thingis which he desirith; and God yyueth not power to hym, that he ete therof, but a straunge man shal deuoure it. This is vanyte, and a greet wretchidnesse.
3If a man gendrith an hundrid fre sones, and lyueth many yeris, and hath many daies of age, and his soule vsith not the goodis of his catel, and wantith biriyng; Y pronounce of this man, that a deed borun child is betere than he.
4For he cometh in veyn, and goith to derknessis; and his name schal be don a wei bi foryetyng.
5He siy not the sunne, nether knew dyuersyte of good and of yuel;
6also thouy he lyueth twei thousynde yeeris, and vsith not goodis; whether alle thingis hasten not to o place?
7Al the trauel of a man is in his mouth, but the soule of hym schal not be fillid with goodis.
8What hath a wijs man more than a fool? and what hath a pore man, no but that he go thidur, where is lijf?
9It is betere to se that, that thou coueitist, than to desire that, that thou knowist not; but also this is vanyte, and presumpcioun of spirit.
10The name of hym that schal come, is clepid now, and it is knowun, that he is a man, and he mai not stryue in doom ayens a strongere than hym silf.
11Wordis ben ful manye, and han myche vanyte in dispuytinge.
Also read this chapter in: KJV, WEB, ASV, GNV, WBT, DBY, YLT