Job 32 WYC
Summary: The narrator introduces a new character, Elihu son of Barachel the Buzite, who has been listening silently because he is younger than the others, but grows angry both at Job for justifying himself over God and at the three friends for condemning Job without being able to answer him convincingly. Elihu explains that he waited respectfully for age to speak first, but concludes that wisdom comes from the spirit of the Almighty in a person rather than simply from age, and that he is now compelled to speak since the older men have run out of arguments. He describes himself as full of words and pressured internally like unvented wine or new wineskins ready to burst, promising to speak honestly and without flattery toward anyone.
1Forsothe these thre men leften of to answere Joob, for he semyde a iust man to hem.
2And Helyu, the sone of Barachel Buzites, of the kynrede of Ram, was wrooth, and hadde indignacioun; forsothe he was wrooth ayens Joob, for he seide hym silf to be iust bifor God.
3Sotheli Helyu hadde indignacioun ayens the thre frendis of hym, for thei hadden not founde resonable answere, but oneli hadde condempned Joob.
4Therfor Helyu abood Joob spekynge, for thei, that spaken, weren eldere men.
5But whanne he hadde seyn, that thre men myyten not answere, he was wrooth greetly.
6And Helyu, the sone of Barachel Buzites, answeride, and seyde, Y am yongere in tyme, sotheli ye ben eldere; therfor with heed holdun doun Y dredde to schewe to you my sentence.
7For Y hopide that lengere age schulde speke, and that the multitude of yeeris schulden teche wisdom.
8But as Y se, spirit is in men, and the enspiryng `ether reuelacioun, of Almyyti God yyueth vndurstondyng.
9Men of long lijf ben not wise, and elde men vndurstonden not doom.
10Therfor Y schal seie, Here ye me, and Y also schal schewe my kunnyng to you.
11For Y abood youre wordis, Y herde youre prudence, as long as ye dispuytiden in youre wordis.
12And as long as Y gesside you to seie ony thing, Y bihelde; but as Y se, `noon is of you, that may repreue Joob, and answere to hise wordis;
13lest perauenture ye seien, We han founde wisdom; God, and not man, hath cast hym awei.
14Joob spak no thing to me, and Y not bi youre wordis schal answere hym.
15Thei dredden, and answeriden no more, and token awei speche fro hem silf.
16Therfor for Y abood, and thei spaken not, thei stoden, and answeriden no more; also Y schal answere my part,
17and Y schal schewe my kunnyng.
18For Y am ful of wordis, and the spirit of my wombe, `that is, mynde, constreyneth me.
19Lo! my wombe is as must with out `spigot, ether a ventyng, that brekith newe vessels.
20Y schal speke, and brethe ayen a litil; Y schal opene my lippis, and Y schal answere.
21Y schal not take the persoone of man, and Y schal not make God euene to man.
22For Y woot not hou long Y schal abide, and if my Makere take me awei `after a litil tyme.
Also read this chapter in: KJV, WEB, ASV, GNV, WBT, DBY, YLT