Proverbs 13 WYC
Summary: This chapter praises the wise son who heeds his father's instruction over the scoffer who ignores rebuke, and warns that "wealth gained hastily will dwindle, but whoever gathers little by little will increase it" (v. 11). It observes that "hope deferred makes the heart sick, but a desire fulfilled is a tree of life" (v. 12), and famously counsels that whoever spares the rod of discipline hates his son, while the one who loves him is diligent to discipline him (v. 24). The chapter closes noting that the righteous eat to their satisfaction while the wicked go hungry, and that a good man leaves an inheritance to his children's children.
1A wijs sone is the teching of the fadir; but he that is a scornere, herith not, whanne he is repreuyd.
2A man schal be fillid with goodis of the fruit of his mouth; but the soule of vnpitouse men is wickid.
3He that kepith his mouth, kepith his soule; but he that is vnwar to speke, schal feel yuels.
4A slow man wole, and wole not; but the soule of hem that worchen schal be maad fat.
5A iust man schal wlate a fals word; but a wickid man schendith, and schal be schent.
6Riytfulnesse kepith the weie of an innocent man; but wickidnesse disseyueth a synnere.
7A man is as riche, whanne he hath no thing; and a man is as pore, whanne he is in many richessis.
8Redempcioun of the soule of man is hise richessis; but he that is pore, suffrith not blamyng.
9The liyt of iust men makith glad; but the lanterne of wickid men schal be quenchid.
10Stryues ben euere a mong proude men; but thei that don alle thingis with counsel, ben gouerned bi wisdom.
11Hastid catel schal be maad lesse; but that that is gaderid litil and litil with hond, schal be multiplied.
12Hope which is dilaied, turmentith the soule; a tre of lijf is desir comyng.
13He that bacbitith ony thing, byndith hym silf in to tyme to comynge; but he that dredith the comaundement, schal lyue in pees.
14The lawe of a wise man is a welle of lijf; that he bowe awei fro the falling of deth.
15Good teching schal yyue grace; a swolowe is in the weie of dispiseris.
16A fel man doith alle thingis with counsel; but he that is a fool, schal opene foli.
17The messanger of a wickid man schal falle in to yuel; a feithful messanger is helthe.
18Nedynesse and schenschip is to him that forsakith techyng; but he that assentith to a blamere, schal be glorified.
19Desir, if it is fillid, delitith the soule; foolis wlaten hem that fleen yuels.
20He that goith with wijs men, schal be wijs; the freend of foolis schal be maad lijk hem.
21Yuel pursueth synneris; and goodis schulen be yoldun to iust men.
22A good man schal leeue aftir him eiris, sones, and the sones of sones; and the catel of a synnere is kept to a iust man.
23Many meetis ben in the new tilid feeldis of fadris; and ben gaderid to othere men with out doom.
24He that sparith the yerde, hatith his sone; but he that loueth him, techith bisili.
25A iust man etith, and fillith his soule; but the wombe of wickid men is vnable to be fillid.
Also read this chapter in: KJV, WEB, ASV, GNV, WBT, DBY, YLT