Revelation 4 WYC
Summary: John is caught up through an open door in heaven and sees a throne with one seated on it whose appearance is like jasper and carnelian, surrounded by a rainbow like an emerald, with twenty-four elders on thrones wearing white garments and golden crowns, and flashes of lightning and thunder proceeding from the throne. Before the throne burn seven torches of fire, the seven spirits of God, and a sea of glass like crystal, with four living creatures full of eyes, resembling a lion, an ox, a man, and an eagle, who never cease proclaiming, "Holy, holy, holy, is the Lord God Almighty" (v. 8). The twenty-four elders fall down and cast their crowns before the throne, worshiping the one who lives forever as worthy of glory, honor, and power because he created all things.
1Aftir these thingis Y say, and lo! a dore was openyd in heuene. And the firste vois that Y herde, was as of a trumpe spekinge with me, and seide, Stye thou vp hidur, and Y shal schewe to thee whiche thingis it bihoueth to be don soone aftir these thingus.
2Anoon Y was in spirit, and lo! a seete was sett in heuene, and vpon the seete oon sittynge.
3And he that sat, was lijk the siyt of a stoon iaspis, and to sardyn; and a reynbowe was in cumpas of the seete, lijk the siyt of smaragdyn.
4And in the cumpas of the seete weren foure and twenti smale seetis; and aboue the troones foure and twenti eldre men sittinge, hilid aboute with whijt clothis, and in the heedis of hem goldun corouns.
5And leitis, and voices, and thundringis camen out of the trone; and seuene laumpis brennynge bifore the trone, whiche ben the seuene spiritis of God.
6And bifor the seete as a see of glas, lijk a crystal, and in the myddil of the seete, and in the cumpas of the seete, foure beestis ful of iyen bifore and bihynde.
7And the firste beeste lijk a lyoun; and the secounde beeste lijk a calf; and the thridde beeste hauynge a face as of a man; and the fourthe beeste lijk an egle fleynge.
8And the foure beestis hadden euery of hem sixe wyngis; and al aboute and with ynne thei weren ful of iyen; and thei hadden not reste dai and nyyt, seiynge, Hooli, hooli, hooli, the Lord God almyyti, that was, and that is, and that is to comynge.
9And whanne tho foure beestis yauen glorie, and honour, and blessing to hym that sat on the trone, that lyueth in to worldis of worldis,
10the foure and twenti eldre men fellen doun bifor hym that sat on the trone, and worschipiden hym that lyueth in to worldis of worldis. And thei casten her corouns bifor the trone,
11and seiden, Thou, Lord `oure God, art worthi to take glorie, and onour, and vertu; for thou madist of nouyt alle thingis, and for thi wille tho weren, and ben maad of nouyt.
Also read this chapter in: KJV, WEB, ASV, GNV, WBT, DBY, YLT