Song of Solomon 7 WYC
Summary: The beloved offers a third wasf, this time moving upward from the woman's feet and thighs to her navel, waist, breasts, neck, eyes, nose, head, and flowing hair, comparing her stature to a palm tree he intends to climb, her breasts to its clusters, and her mouth to the best wine. The woman answers eagerly, declaring the wine should flow smoothly for her beloved, and inviting him to go out with her to the vineyards and villages to see whether the vines have budded, where she will give him her love. She mentions mandrakes giving forth fragrance and fruits both new and old that she has stored up for him at their doors.
1Douytir of the prince, thi goyngis ben ful faire in schoon; the ioyncturis of thi heppis ben as brochis, that ben maad bi the hond of a crafti man.
2Thi nawle is as a round cuppe, and wel formed, that hath neuere nede to drynkis; thi wombe is as an heep of whete, biset aboute with lilies.
3Thi twei teetis ben as twei kidis, twynnes of a capret.
4Thi necke is as a tour of yuer; thin iyen ben as cisternes in Esebon, that ben in the yate of the douyter of multitude; thi nose is as the tour of Liban, that biholdith ayens Damask.
5Thin heed is as Carmele; and the heeres of thin heed ben as the kyngis purpur, ioyned to trowyis.
6Dereworthe spousesse, thou art ful fair, and ful schappli in delices.
7Thi stature is licned to a palm tree, and thi tetis to clustris of grapis.
8I seide, Y schal stie in to a palm tree, and Y schal take the fruytis therof. And thi tetis schulen be as the clustris of grapis of a vyner; and the odour of thi mouth as the odour of pumgranatis;
9thi throte schal be as beste wyn. Worthi to my derlyng for to drynke, and to hise lippis and teeth to chewe.
10Y schal cleue by loue to my derlyng, and his turnyng schal be to me.
11Come thou, my derlyng, go we out in to the feeld; dwelle we togidere in townes.
12Ryse we eerli to the vyner; se we, if the vyner hath flourid, if the flouris bryngen forth fruytis, if pumgranatis han flourid; there I schal yyue to thee my tetis.
13Mandrogoris han youe her odour in oure yatis; my derlyng, Y haue kept to thee alle applis, new and elde.
Also read this chapter in: KJV, WEB, ASV, GNV, WBT, DBY, YLT