Psalms 7 WYC
Summary: Titled a "Shiggaion of David, which he sang to the LORD concerning the words of Cush, a Benjaminite," this is a plea for vindication against a specific, otherwise unrecorded false accusation. The psalmist swears his own innocence, inviting judgment on himself if he has done the wrong of which he's accused (v. 3-5), then describes the wicked as digging a pit and falling into their own trap: "he has made a pit, digging it out, and has fallen into the hole that he made" (v. 15). It closes with praise for God's righteous judgment.
1The title of the seuenthe salm. For the ignoraunce of Dauid, which he songe to the Lord on the wordis of Ethiopien, the sone of Gemyny.
2Mi Lord God, Y haue hopid in thee; make thou me saaf fro alle that pursuen me, and delyuere thou me.
3Lest ony tyme he as a lioun rauysche my soule; the while noon is that ayenbieth, nether that makith saaf.
4Mi Lord God, if Y dide this thing, if wickidnesse is in myn hondis;
5if Y `yeldide to men yeldynge to me yuels, falle Y `bi disseruyng voide fro myn enemyes;
6myn enemy pursue my soule, and take, and defoule my lijf in erthe; and brynge my glorie in to dust.
7Lord, rise thou vp in thin ire; and be thou reysid in the coostis of myn enemyes.
8And, my Lord God, rise thou in the comaundement, which thou `hast comaundid; and the synagoge of puplis schal cumpasse thee.
9And for this go thou ayen an hiy; the Lord demeth puplis. Lord, deme thou me bi my riytfulnesse; and bi myn innocence on me.
10The wickidnesse of synneris be endid; and thou, God, sekyng the hertis and reynes, schalt dresse a iust man.
11Mi iust help is of the Lord; that makith saaf riytful men in herte.
12The Lord is a iust iuge, stronge and pacient; whether he is wrooth bi alle daies?
13If ye ben `not conuertid, he schal florische his swerd; he hath bent his bouwe, and made it redi.
14And therynne he hath maad redi the vessels of deth; he hath fulli maad his arewis with brennynge thingis.
15Lo! he conseyuede sorewe; he peynfuli brouyte forth vnriytfulnesse, and childide wickidnesse.
16He openide a lake, and diggide it out; and he felde in to the dich which he made.
17His sorewe schal be turned in to his heed; and his wickidnesse schal come doun in to his necke.
18I schal knouleche to the Lord bi his riytfulnesse; and Y schal synge to the name of the hiyeste Lord.
Also read this chapter in: KJV, WEB, ASV, GNV, WBT, DBY, YLT